Globalizazio basatiak agerian utzi du gure bizimoduak inguruneak ematen dizkigun baliabideak gainditzen dituela.
Desazelerazioaz, deszentralizazioaz, subiranotasun eta kontrol autonomoaz hitz egiten da hainbat esparrutan, eta esparru teknologikoa, jakina, ez dago guzti horretatik kanpo.
Asko dira menpekotasun teknologikoa murrizteko teknologia berrien garapenean, ekoizpenean eta eskuragarritasunean borrokan ari diren herrialde zein herritar taldeak. Teknologia libre, deszentralizatu eta federatuen aldeko apustua eginez.
Garrantzitsua da gizarteak egoera eta arazoa ulertzea, ezagutzatik abiatuta, herritarrek teknologiari buruzko erabaki aktiboak har ditzaten.
Utopia zerumugan dago.
Bi pauso ematen ditugu eta bera bi pauso urruntzen da.
Ibili arren, ez dugu inoiz harrapatuko.
Orduan, zertarako balio du utopiak?
Horretarako, ibiltzeko balio du.
Visual thikinga: Aare Castilla - Make it Visual
Zergatik aldatu behar dugu errealitatea? Argi dago mundua abiadura izugarrian aldatzin ari dela. Zer ari da gertatzen?
Bestelako mundu bat nahi dugu. Nondik hasi?
Pasa den urriaren 27an, Euskarabildua jardunaldia ospatu genuen. “Utopia existitzen da, Teknologia burujabea herritik eta herrira” izenburupean, aurtengo jardunaldiak menpekotasun teknologikoa murrizteko tokiko eragileen arteko saretzearen indarra balioan jarri nahi zuen.
Aurtengo Euskarabilduak pandemiak galarazitako harreman pertsonalak berreskuratu nahi zituen. Horregatik, jardunaldiaren amaieran dinamika bat antolatu genuen. Hala ere, beti bezala, jardunaldia streaming bidez jarraitzeko aukera egon zen eta hitzaldiak webgune honetan eskuragarri dituzue.
Jardunaldia Elisabeth Pombo Iametzako kudeatzailearen aurkezpenarekin hasi zen: 'Tokikotasunaren indarra utopia errealitate bilakatzeko'.
"Ezinezkoa dirudien bide hori egiteak ere nahikoa balioa du. Euskal Herri digital eta burujabea lortzea posible dela erakusten duten ereduak baditugu. Honek teknologia burujabetzaren bidean ere urratsak egitea posible dela erakusten digu".
Jarraian, Antic Pays Basque et Atelier Lan Berriko Amandine Lafferrairiek digitalizazio arduratsuari buruzko hitzaldia eman zuen: 'Le numérique responsable: politiques strcturantes et practiques empiriques'.
"Digitalizazio arduratsuaren ikuspegiak bilakaera handia izan du, baina gure erabilerak gizartean eta ingurunean dituen aztarnak txikitzea du oinarri. Arlo ezberdinak bereizten dira zentzu honetan, horien artean, IT for green, ingurumenean gure aztarna murrizteko; IT for Human, denen zerbitzurako digitalizazioaren alde; eta Human IT, pertsonak gehiago errespetatzen dituen digitalizazio baten alde".
Ondoren, datuen garrantziaren blokea izan genuen, Errenteriako Udaleko Eñaut Graciaren eta iametzako Asier Iturralderen eskutik. Eñaut Graciaren hitzaldia 'Estrategia komunikatibotik data center batera' izan zen.
"Errenteriako kasu praktikoa esperientzia konkretu batetik abiatzen da, momentu kritikoetan komunikazio kanal propioak edukitzea zein garrantzitsua den erakutsi zienak. Zergatik burujabetza? Komunikazioa boterearen dialektikan dagoelako eta burujabetza komunikazioa bermatzeko modu bakarra delako; burujabetzaren aldeko apostua egitea jakintzaren aldeko apostua egitea delako; eta burujabe ez izatea menpekotasuna edukitzea delako. Eta instituzioek burujabe izan behar dute".
Honekin lotuta, Asier Iturraldek 'Matomo: web-analitika alternatiboa eta hizkuntzaren tratamendua' hitzaldia eskaini zuen:
"Web analitika gai arrotza da gehiengoarentzat, baina gure bizitzan eragin zuzena du. Matomo software librea da, datuak webguneko trafikoa soilik aztertzeko erabiltzen dira, datuak ez dira Europar Batasunetik irteten... Eta hizkuntzaren tratamenduari dagokionez ere, honen alde egiteko arrazoiak asko dira: 67 hizkuntzatara ari da itzultzen, edozeinek proposatu dezake hizkuntza berri bat, osatze maila aldakorra dauka eta software librearen hizkuntza trataera tipikoa dauka (gardentasuna, hizkuntza aniztasuna, komunitatearen parte hartzea...)".
Atsedena eta gero, hezkuntzaren inguruan hausnartzeko aukera izan genuen Xnet proiektuaren bidez. Horretarako, Xnet proiektuaren sustatzailea den Simona Levi eta Bartzelonako Udaleko Arnau Monterderen hitzaldiez gozatu genuen: 'DD: Digitalización democrática de la educación'. Simona Levi Xnet proiektuaren sortzailea da. Xnet Google edo Microsoft bezalako korporazio teknologiko handien produktu pribatiboen alternatiba azkarra gisa aurkezten da, kode publiko, auditagarri eta elkarreragina duena. "Gaur egun Bartzelonako Udalarekin lanean gaude eta Bartzelonako bi irakaskuntza zentroetan probatzen ari gara. Honek pilotu bat edukitzea ahalbidetuko digu, Europako beste herrialdeetan erabiltzeko". Bartzelonako Udaleko Arnau Monterdek pilotu honek irekitzen dituen ateetan ipini zuen ardatza. DD proiektuak gizartearentzat eta erakundeen lankidetzarekin teknologia libreak nola garatu ditzakegun ikusteko adibide gisa balio digu. Aukera pedagogikoa ere bada gure datuen eskubideei buruzko hausnarketa egiteko.
Ondoren, tokiko burujabetzak lantzeko mahai-inguru bat izan genuen: 'Zergatik, nola eta hemendik aurrera zer?' ardatzaren baitan. Hurrengo partaideak izan genituen: Lakari kooperatibako Leire Udabe; Lau Haizetara Euskaltzaleon Topaguneko Josu Harismendy; Sakananet proiektutik eta Arruazuko Udaleko alkatea Gorka Ovejero; eta Hernani Burujabe egitasmotik Hernaniko Udaleko alkatea Xabier Lertxundi. Proiektu hauetan guztiek teknologia burujabetza zeharlerro bezala ulertzen dute eta kasu batzuetan hasieratik prozesua nolakoa izan zen ezagutzeko aukera izan genuen.
Aurtengo jardunaldian bertaratuen parte-hartzea bereziki garrantzitsua zen. Horregatik, jardunaldia dinamika batekin bukatu genuen. Bertaratutakoak lau lan-mahaitan banatu genituen, hezkuntza, telekomunikazioak, informazioa eta komunikabideak, eta gobernantza. Hausnarketa interesgarriak atera ziren eta hitzetatik harago joatea zaila bada ere, jardunaldiaren hasieran Elisabeth Pombok egin zuen hausnarketa biribildu zuen: Ezinezkoa dirudien bide hori egiteak bere balioa dauka eta ateratako hausnarketa eta ideia guztiei esker teknologia burujabetzaren bidean urratsak egitea posible dela sinetsi genuen.
antolatzaileak:
babesleak:
laguntzaileak:
© 2012-2024 Euskarabildua - Ametzagaiña Taldea
