Alexis Kauffmann Framasoft elkartearen fundatzailea da eta aktibista izatetik Frantziako Hezkuntza Ministerioko software libre eta baliabide irekien proiektu arduradun izatera pasa da, pandemia garaian instituzio horrek hautemandako hutsuneen aurrean Twitterren bere burua eskainiz idatzitako post bati esker.
Alexis-ek bere hitzaldian batik bat ondasun komun digitalei buruz edo komunal digitalei buruz hitz egin zuen. ‘Komunal digitalak’ kontzeptuak hiru hanka ditu: baliabideak, komunitatea eta gobernantza. Ondasun komunak edo komunalak betidanik egon dira (baratzak, larreak...), orain komunal digitalak zabaldu egin dira erraztasunak ematen dituztelako horiek komunitatean zabaltzeko. Komunal digital bezala ulertzen ditugu softwareak, kodeak, datu baseak, edukia, eta abar. Hiru zutabe horietatik, berarentzat garrantzitsuena komunitatea da. Alexis-ek nabarmendu nahi izan zuen erabiltzaile xumea izanik ere, komunitatearen parte izan gaitezkeela.
Komunal digitalek eta hezkuntzak balio asko partekatzen dituztela esan zuen Alexisek: iraunkorrak dira, fidagarriak, inklusioa bultzatzen dute, motibagarriak izan behar dira... Frantziako hezkuntzan erabiltzen diren baliabide libreak ere ezagutzera eman zituen. Hala nola, Vikidia gazteentzako Wikipedia, PrimTux hezkuntza mundura egokitutako Linux banaketa eta BigBlueButton, online saioetarako tresna.
Bere hitzaldia itxaropena, eraldaketa eta trantsizio ekologikoa aldarrikatuz bukatu zuen. Gaur egun, digitala eta ekologia kontra jartzen ditugun kontzeptuak direla esan zuen, baina egiaz bateragarriak direla. Horregatik berrerabili beharra defendatu zuen.
